Царините, војните, геополитичките тензии и сè пожестоката конкуренција создадоа сериозни потешкотии.
Групацијата Volkswagen забележа уште еден пад на добивката во вториот квартал, со што се потврдува дека најголемиот европски производител на автомобили се соочува со сериозна деловна криза.
Во периодот од април до јуни, нето-добивката по оданочување изнесувала 1,54 милијарди евра, што претставува пад од 32,9 проценти во споредба со истиот период лани, соопшти компанијата од Волфсбург.
Во вториот квартал од 2025 година, Volkswagen оствари добивка од 2,29 милијарди евра, што и тогаш беше за 36 проценти помалку во однос на претходната година, објави германската новинска агенција DPA.
Испораките на возила на ниво на целата групација се намалиле за речиси девет проценти, на 2,08 милиони возила, како што компанијата претходно и најави. На клучниот кинески пазар, продажбата бележи уште поголем пад – за повеќе од една третина, на 424.300 возила. Сепак, надвор од Кина, продажните резултати биле нешто подобри.
Извршниот директор Оливер Блуме изјави дека царините, војните, геополитичките тензии и сè посилната конкуренција значително го отежнале работењето на компанијата.
Поради тоа, Volkswagen подготвува нови мерки за намалување на трошоците, кои би можеле да опфатат укинување до 50.000 работни места ширум светот и преиспитување на иднината на четири фабрики во Германија. Ова е дополнително на веќе најавениот план за укинување на 50.000 работни места до 2030 година.
На овие планови силно се спротивставуваат синдикатите и работничкиот совет. Противење има и од покраината Долна Саксонија, која поседува 20 проценти од акциите на Volkswagen и има двајца претставници во Надзорниот одбор. Заедно со претставниците на вработените, тие располагаат со мнозинство во одборот. Според медиумските извештаи, Надзорниот одбор првично ги одбил предложените мерки.
Volkswagen веќе објави дека до 2030 година планира да укине 50.000 работни места во Германија. Од нив, 35.000 ќе бидат во рамките на матичниот бренд Volkswagen, а останатите во подружниците како Audi и Porsche. Досега, повеќе од 37.000 вработени веќе потпишале договори поврзани со оваа програма.
