Американскиот инвестициски фонд „Нобл Капитал РСД“ поднесе тужба пред федералниот суд во САД со која бара од Русија да ѝ исплати повеќе од 225 милијарди долари на име неисплатени долгови од обврзници што Рускиот императорски режим ги издал пред повеќе од еден век.
Во тужбата поднесена во Окружниот суд за дистриктот Колумбија, фондот наведува дека има право да ги наплати овие обврзници кои потекнуваат од 1916 година и имаат каматна стапка од 5,5 отсто, но никогаш не биле исплатени по Револуцијата во 1917 година. „Нобл Капитал“ тврди дека Русија, како правен наследник на поранешната држава, треба да ја признае обврската и да ја покрие и главнината и наталожените камати кои со текот на времето значително ја зголемиле вредноста на долгот.
Фондот предлага дека долгот може да се покрие со користење на замрзнати суверени руски средства, кои западните земји ги замрзнаа како дел од санкциите воведени по анексијата на Крим во 2014 година и по почетокот на полноправната инвазија на Украина во 2022 година.
Според адвокати што ги анализирале случајот, шансите „Нобл Капитал“ да успее да добие целосно враќање на бараниот износ се оценуваат како многу мали, бидејќи станува збор за долгот што бил официјално отфрлен пред повеќе од 100 години. Сепак, овој правен потег може да отвори прашања за можностите за користење на замрзнатите руски средства преку приватни правни механизми, наместо преку политички мерки или државни одлуки.
Русија, преку своите преставници, побара од фондот да ја повлече тужбата до 30 јануари, најавувајќи дека ќе поднесе барање за отфрлање на случајот со образложение дека рускиот суверенитет и имунитет не дозволуваат такви постапки пред американскиот закон.
Овој судски спор доаѓа во време кога западните држави со години дискутираат како да ги искористат замрзнатите руски финансиски средства за компензација на штетите предизвикани од војната во Украина, но различните правни, политички и економски пречки го отежнуваат постигнувањето на единствен став.
