- Европската комисија предложи доделување финансиска помош во износ од 7,5 милиони евра за работниците кои останаа без работа поради реструктуирањето на германскиот автомобилски гигант „Ауди“ во Белгија.
Средствата се предвидени преку Европскиот фонд за прилагодување кон глобализацијата и имаат цел да им помогнат на отпуштените вработени полесно да се вклучат повторно на пазарот на трудот. Поддршката ќе опфати мерки како стручно оспособување, преквалификација, советување за вработување, како и индивидуална помош при барање ново работно место.
Отпуштањата се резултат на структурни промени во автомобилската индустрија, зголемената конкуренција и транзицијата кон електрични возила, што доведе до намалување на производството и работните места во белгиските капацитети на компанијата.
Од Европската комисија посочуваат дека ваквата поддршка е клучна за ублажување на социјалните последици од индустриските промени и за зајакнување на социјалната кохезија во погодените региони.
Предлогот за финансиска помош треба да биде одобрен од Европскиот парламент и Советот на ЕУ, по што средствата ќе можат да бидат ставени на располагање на националните институции во Белгија.
