Цената на нафтата може да скокне до 157 долари за барел поради конфликтот на Блискиот Исток, прогнозира Светската банка за пазарот на суровини објавена денеска.
Во извештајот има прелиминарна проценка на можните краткорочни импликации од конфликтот на пазарите на стоки. Според Светската банка, ефектите од конфликтот врз цената на стоките ќе бидат ограничени доколку конфликтот не се прошири.
Светска банка прогнозира дека просечните цени на нафтата во тековниот квартал ќе бидат 90 долари за барел, а следната година ќе паднат на 81 долар за барел поради забавувањето на економскиот раст. Доколку конфликтот меѓу Израел и палестинското движење Хамас се разгори и се прошири, се предвидуваат три сценарија:
Според сценариото за т.н. „мало нарушување“, глобалните резерви на нафта би се намалиле за 500 илјади до два милиони барели дневно или приближно еднакво на падот забележан за време на либиската граѓанска војна во 2011 година. Во ова сценарио, цената на нафтата првично би се зголемила меѓу три и 13 отсто во споредба со просекот за тековниот квартал, во опсег од 93 до 102 долари за барел.
Сценариото за „средно нарушување“ пак е приближно на последиците од војната во Ирак во 2003 година, глобалните резерви на нафта би се намалиле за три до пет милиони барели дневно, што првично би ги зголемило цените на нафтата за 21 отсто до 35 отсто, или меѓу 109 и 121 долари за барел.
Спроед сценариото за „големо нарушување“, кое е пандан со арапското нафтено ембарго од 1973 година, се предвидува намалување на глобалните резерви на нафта за шест до осум милиони барели дневно. Во тој случај цените би се зголемиле за 56 до 75 отсто и би се движеле меѓу 140 и 157 долари за барел.
Главниот економист на Светската банка, Индермит Гил предупредува дека ако конфликтот се разгори, глобалната економија ќе се соочи со двоен енергетски шок за прв пат по децении, не само поради војната во Украина, туку и поради Блискиот Исток.
