Европската унија издвои 134 милиони евра за модернизација, реконструкција и електрификација на железничката делница Ниш-Димитровград.
Финансискиот пакет вклучува заем од Европската инвестициска банка (ЕИБ Глобал) во вредност од 100 милиони евра за реконструкција на железничката пруга Сиќево-Димитровград, електрификација и поставување сигнализација по целата делница Ниш-Димитровград, како и 34 милиони евра грантови од ЕУ за изградба на железничката обиколница околу Ниш, објави денес ЕИБ.
Овие инвестиции значително ќе го подобрат капацитетот на железницата, безбедноста и квалитетот на транспортот и ќе го намалат сообраќајниот метеж во Ниш, се вели во соопштението, во кое се додава дека поддршката на ЕУ за оваа делница достигна 342 милиони евра, вклучувајќи ги глобалните заеми на ЕИБ во вредност од 234 милиони евра и грантовите од ЕУ од 108 милиони евра.
Првиот вицепремиер и министер за финансии на Србија, Синиша Мали оцени дека реконструкцијата на железницата Ниш-Димитровград е многу важен проект за Србија, со кој се продолжува модернизацијата и подобрување на квалитетот на железничката мрежа во Србија.
„Важноста на таа железница е огромна, ако се има предвид дека е дел од Коридорот 10 и дека претставува врска меѓу Србија и Бугарија, како и рута низ која се движат големи количини стока. Во исто време, се решава проблемот со „Нишкиот јазол“, како важна крстосница на југот на Србија. Продолжуваме со развојот на Србија и го подобруваме квалитетот на животот во нашата земја, а воспоставувањето на најсовремена железничка мрежа е значаен чекор во тој процес“, нагласи Мали.
Подобрената инфраструктура долж оваа витална железничка рута ќе овозможи зголемување на брзината од просек од 50 км/ч на максимум 120 км/ч и ќе има позитивно влијание врз навиките за патување на луѓето, бидејќи се очекува годишниот број на патници да се зголеми од приближно 170.000 на приближно 550.000, а вкупниот товарен транспорт од 3,2 на приближно 6,2 милиони тони годишно.
Министерката за градежништво, транспорт и инфраструктура, Александра Софронијевиќ, истакна дека благодарение на поддршката од Европската Унија и Европската инвестициска банка, реализацијата на проектот Ниш-Димитровград започна кон крајот на 2023 година.
„ЕИБ и ЕУ продолжија да го поддржуваат развојот и изградбата на овој инфраструктурен проект од високо јавно значење со потпишување нови договори за заеми и грантови, што создаде клучен финансиски предуслов за континуирана модернизација на железничката делница Ниш-Димитровград, што овозможува подобро поврзување со мрежата TEN-T, што претставува клучен чекор кон електрификација на последниот неелектрифициран дел од Коридорот 10“, рече таа.
Таа изрази благодарност до ЕИБ за нејзината постојана поддршка на проектот Ниш-Димитровград и ја потврди посветеноста на Србија за развој на модерна и конкурентна железничка мрежа во партнерство со ЕИБ, што го поддржува економскиот раст и ја зајакнува транзитната улога на Србија во регионот на Југоисточна Европа.
Проектот се реализира и благодарение на техничката поддршка од ЕИБ преку програмата JASPERS и Инвестициската рамка за Западен Балкан. Тој вклучуваше детална подготовка за обиколницата околу Ниш и помош во реализацијата на железничката врска помеѓу Ниш и Димитровград.
„Како дел од клучната меѓународна транспортна мрежа што ја поврзува Србија со земјите од ЕУ, овој проект е од клучно значење за посилна регионална интеграција, поттикнување на трговските текови и забрзување на економскиот раст“, рече потпретседателот на ЕИБ, Роберт де Грот.
Тој додаде дека проектот ќе го подобри квалитетот, достапноста и сигурноста на националните и прекуграничните железнички услуги, а воедно ќе овозможи постепен премин кон позелени форми на мобилност. Грантовите од ЕУ во износ од 34 милиони евра обезбедени во рамките на инвестициската рамка за Западен Балкан ќе овозможат изградба на железничка обиколница околу Ниш. Целта е да се намали сообраќајниот метеж и да се подобри функционалноста на транспортот во Ниш преку интегрирано планирање во согласност со стандардите на ЕУ.
„Овој проект е клучен дел од пошироката инвестициска програма на Србија за одржлив транспорт, која користи силна поддршка во рамките на иницијативата „Тим Европа“, обединувајќи значителни финансиски ресурси и техничка експертиза“, рече амбасадорот на ЕУ во Србија, Андреас фон Бекерат.
