Централната банка на Русија соопшти дека пред Суд во Москва подигна тужба против клириншката куќа „Еуроклир“ со седиште во Брисел, каде се депонирани најголемиот дел од замрзнатите руски суверени средства во ЕУ.
Во соопштението на Банката, како што јавија белгиските медиуми, се наведува дека „Еуроклир“, каде се замрзнати околу 185 милијарди евра руски средства, е виновна за „штетни активности што ја спречуваат Банката слободно да располага со сопствените средства и хартии од вредност“.
Централната банка на Русија оценува и дека сите директните и индиректните обиди на ЕУ за користење на замрзнатите руските средства се „целосно илегални“ и во спротивност со меѓународното право, бидејќи го нарушуваат „суверениот имунитет на државните средства“.
Најавата од руска Централна банка доаѓа во пресрет на денешниот состанокот на Комитетот на постојаните претставници на владите на земјите членки на ЕУ (Корепер) на која треба да биде донесена одлука за замрзнување на руските суверени средства во блокот на неопределено време.
Одлуката ќе биде формално донесена врз основа на членот 122 од Договорот за функционирање на ЕУ, кој предвидува дека во услови на „економска итност“ одлуки се носат со квалификувано мнозинство, наместо со консензус.
Ваквата одлука се оценува и како чекор напред кон постигнување договор за одобрување на планот за користење на замрзнатите руски средства за исплата на т.н. заем за репарации за Украина, на што се противи Белгија, која бара гаранции дека нема сама да ги сноси ризиците доколку биде потребно овие искористени пари да ѝ се вратат на Русија. Трајното замрзнување на руските средства би претставувало начин за избегнување на враќањето на овие средства на Русија, ако бидат укинат санкциите кон земјата.
Легалноста на предлогот за „трајно замрзнување“ на руските средства врз основа на Членот 122, ја оспори белгискиот премиер Барт де Вевер, кој изрази сомнеж дека има законска основа за таков потег.
– Овој член е за вонредна состојба во ЕУ. Каде е вонредната состојба? Во Украина има вонредна состојба. Но, Украина не е во Европската Унија, рече Де Вевер.
Против замрзнувањето на руските средства на неопределено време се изјасни и унгарскиот премиер Виктор Орбан, кој во објава на Фејсбук ваквата одлуката и начинот на нејзиното усвојување со квалификувано мнозинство, наместо со консензус, ги оцени како „нелегитимни“.
– (Ваквото гласање) ќе предизвика непоправлива штета за Европската Унија. Оваа одлука го укинува владеењето на правото и ги става европските лидери над правилата. Унгарија протестира против одлуката и ќе направи сè што е во нејзина моќ да воспостави законска состојба, додаде Орбан.
Унгарија соопшти дека инсистира да се задржи сегашната пракса кога одлуката за замрзнување на руските средства беше продолжувана на секои шест месеци со консензус меѓу земјите членки.
Целта на денешната одлука на Корепер е да се отстранат стравувањата дека во иднина некоја од членките на ЕУ би можела да стави вето на понатамошно продолжување на одлуката за замрзнување на руските средства.
