Елон Маск, најбогатиот човек на планетата, сруши уште еден рекорд станувајќи првиот поединец во историјата чие богатство изнесува неверојатни 500 милијарди долари, според листата на милијардери на Форбс во реално време.
Неговото богатство денес го надмина тој рекорд откако акциите на Тесла пораснаа за речиси 4 проценти, додавајќи му на Маск околу 9,3 милијарди долари. Само неговиот удел од 12 проценти во Тесла моментално вреди околу 191 милијарда долари, не вклучувајќи ги опциите од контроверзниот пакет за компензација од 2018 година, чија правна судбина сè уште не е одлучена од Врховниот суд на Делавер.
Во меѓувреме, во септември, одборот на директори на Тесла предложи нов, рекорден пакет за компензација кој би можел да му донесе на Маск дополнителни акции во вредност до трилион долари, доколку компанијата ги постигне таканаречените цели „Марс-шот“ – меѓу кои и зголемување на пазарната капитализација за повеќе од осум пати во следните десет години.
Покрај Тесла, значаен дел од богатството на Маск доаѓа и од SpaceX, чија вредност во приватните понуди во август беше проценета на 400 милијарди долари. Маск поседува околу 42 проценти од компанијата, што му носи дополнителни 168 милијарди долари. Тука е и xAI Holdings – новооснован гигант за вештачка интелигенција создаден со спојување на неговата компанија xAI и социјалната мрежа X (порано Twitter), проценет на 113 милијарди долари, од кои Маск контролира 53 проценти, во вредност од околу 60 милијарди долари.
Овој финансиски скок е продолжение на подемот на Маск во текот на изминатите пет години. Додека во март 2020 година тој беше „тежок“ со 24,6 милијарди долари, веќе во август истата година стана петтиот човек во светот со богатство од повеќе од 100 милијарди. За прв пат, тој го зазеде местото на најбогат човек во светот во јануари 2021 година, а во истата година ја премина границата од 200 милијарди. Во ноември 2021 година, тој вредеше 300 милијарди долари, а во декември 2024 година стана првиот човек со 400 милијарди долари.
Доколку ова темпо продолжи, аналитичарите предвидуваат дека Маск би можел да стане првиот трилионер во историјата веќе во 2033 година, кога треба да се исплати првата транша од новиот пакет на Тесла. Самиот Маск, сепак, тврди дека мотивите не се чисто финансиски.
„Не станува збор за „компензација“, туку за тоа дека имам доволно влијание врз Тесла за да обезбедам безбедност ако изградиме милиони роботи. Ако во иднина едноставно можам да бидам отстранет од компании кои ги советуваат акционерите, а тие дури и не поседуваат дел од Тесла, тоа не е иднина со која се чувствувам удобно“, рече Маск претходно на платформата X.
