Републиканскиот сенатор Линдзи Греам, партнерот за голф на Трамп кој систематски ја поддржува Украина, најави дека наскоро доаѓа пресвртница во пристапот на Трамп кон рускиот претседател Владимир Путин.
„Наскоро ќе видите пресвртница во пристапот на Трамп кон Путин“, најави републиканскиот сенатор Линдзи Греам во интервју за ТВ-емисијата „Face The Nation“ на програмата на CBS News во недела, објавува Vecernji list.
Тој додаде дека наскоро американскиот претседател ќе ги заостри санкциите против Русија и сите земји што купуваат нафта од Русија, на кои Трамп ќе може да им воведе царини до 500 проценти.
„Не сакам да се истрчувам пред претседателот, но… Доаѓаме до пресвртница во врска со руската инвазија на Украина. Со месеци, претседателот Трамп се обидуваше да го намами Путин на масата за мир. Тој воведе царини за земјите што дозволуваат увоз на фентанил во нашата земја и кои се однесуваат лошо на други начини. Но, тој ја остави вратата отворена во врска со Русија. Таа врата е пред затворање“, започна Греам.
„Сенаторот Ричард Блументал и јас имаме 85 ко-спонзори во Сенатот на Соединетите Американски Држави за конгресни санкции што ќе му дадат на претседателот Трамп овластување да ја задуши економијата на Путин и сите оние земји што ја поддржуваат воената машина на Путин. Кина, Индија и Бразил купуваат нафта, нафтени производи и други стоки од Русија. Тоа се пари што Путин ги користи за водење војна. И овој конгресен пакет што го разгледуваме би му дал на претседателот Трамп можност да воведе тарифи од 500 проценти на која било земја што ѝ помага на Русија и ја поддржува воената машина на Путин“, додаде тој.
„Тој може да ги зголеми или намали тие тарифи. Може да оди од 0 проценти на 500 проценти. Тој има максимална флексибилност. Но, ние одиме по луѓе што го поддржуваат Путин во неговиот бизнис и одиме во дополнителни санкции против самата Русија. Тоа е навистина овластување што му е на располагање на претседателот Трамп за да ја заврши оваа војна“, рече Греам, кој инаку е близок до Трамп, а исто така силно ја поддржува Украина во нејзината одбрана од Русија.
Брисел преговара и за нов пакет санкции против Русија, веќе осумнаесетти, кој би бил построг од претходниот пакет во однос на заострувањето на мерките во врска со транспортот на руска нафта за извоз во трети земји.
Ројтерс објави дека 18-тиот пакет европски санкции против Русија е повеќе или помалку договорен и дека се чекаат само дополнителни гаранции за Словачка, која до утрово беше единствената земја-членка со одредени резерви во врска со предлогот.
