Претседателот на Иран, Масуд Пезешкијан, одржа говор во парламентот на оваа земја и се осврна на најновите настани и повтори дека Иран не може да се смета за земја агресор и дека сè што прави, го прави само за одбрана од Израел. Во говорот пред пратениците, Пезешкијан рече дека иранскиот народ се спротивставил на кукавичлукот.
„Непријателот не може да нè отстрани нас и нацијата од сцената со тепање, убивање и атентати. За секој херој чие знаме паѓа, има стотици други херои кои ќе го кренат знамето и ќе застанат против суровоста, неправдата, криминалот и предавството извршено од овие кукавици. Нашиот народ силно се спротивстави на кукавичлукот“, рече иранскиот претседател.
Тој, исто така, нагласи дека на Иран му е потребно единство.
„Ние не сме агресори. Денес, повеќе од кога било, ни треба единство и кохезија. Сите граѓани на Иран мора да се обединат и силно да се спротивстават на агресијата што се случи. Денес мора да ги оставиме настрана сите разлики и проблеми и силно да се спротивставиме на оваа криминална, геноцидна агресија со единство“, рече тој.
Тој повтори дека Иран не се стреми кон нуклеарно оружје.
„Ако некој во оваа земја заземе став и зборува против она што го објави раководството, тоа нема место во политиката на Исламската Република. Како резултат на тоа, она што го објави раководството е неоспорна политика на системот и на Исламската Република. Имаме право да користиме нуклеарна енергија за цели на истражување што е од корист за ова општество и никој нема право да му го одземе тоа право на системот и на Исламската Република. Цврсто стоиме зад ова право и не се плашиме од никаква сила во остварувањето на нашето право“, изјави тој.
Тој, исто така, зборуваше за улогата на Соединетите Американски Држави.
„Америка користи сила и, спротивно на меѓународните правила, му дозволува на Израел да ја нападне нашата земја. Ние не побаравме војна, ниту ја започнавме. Ние не ги убивме командантите и научниците во земјата, туку терористите го направија тоа. Каков грев направил еден научник за некој од другата страна на светот да дојде и да го уништи него и неговото семејство?“, праша тој.
