Министерството за земјоделство, шумарство и водостопанство (МЗШВ) го објави јавниот повик за доставување барања за користење средства од Програмата за финансиска поддршка на руралниот развој за 2025 година, наменет за модернизација на земјоделските стопанства преку набавка на трактори.
-Министерството за земјоделство, шумарство и водостопанство продолжува со континуираната поддршка за модернизација на земјоделскиот сектор. Денеска се објави јавниот повик бр.04/2025 за доставување на барања за користење на средства од Програмата за финансиска поддршка на руралниот развој за 2025 година, наменет за модернизација на земјоделските стопанства преку набавка на трактори, велат од Министерството.
Мерката 121.8, за набавка на трактори предвидува максимална поддршка по корисник од 600.000 денари, а поддршката се исплаќа на годишно ниво според реализацијата на деловниот план.
Јавниот повик, велат од МЗШВ, се однесува исклучително за набавка на трактори, а приклучната земјоделска механизација не е покриена.
-Право на користење на средствата имаат земјоделски стопанства кои се запишани во Единствениот регистар на земјоделски стопанства во Министерство за земјоделство, шумарство и водостопанство, согласно Закон за земјоделство и рурален развој. Земјоделци кои во претходните десет години користеле финансиска поддршка за набавка на трактори преку ИПАРД Програмата или Националните програми за рурален развој, не се прифатливи како корисници на оваа мерка, појаснуваат од Министерството.
Крајниот рок за доставување на барањата е 07.07.2025 година.
Преку поддршката на инвестициите за модернизација, потенцираат од МЗШВ, се придонесува кон зголемување на конкурентноста и продуктивноста во земјоделскиот сектор.
