Загубата на Кроација ерлајнс за минатата година изнесува 19,6 милиони евра, се наведува во финансискиот извештај.
Во 2024 година оперативната загуба изнесуваше 16 милиони евра, а по вклучувањето на нето резултатите од финансирањето загубата беше 19,6 милиони евра, се вели во извештајот. Годината претходно беше остварена нето добивка од 2,3 милиони евра.
Вкупните приходи лани изнесуваат 268,5 милиони евра, за 1,8 отсто повеќе од претходната година. Расходите се зголемени за десет отсто, на 287,9 милиони евра.
Минатата година „Кроација ерлајнс“ превезе 1.838.609 патници, што е за шест отсто повеќе од 2023 година. Во образложението на резултатите се наведува дека периодот на инвестицискиот циклус за замена на возниот парк се карактеризира со оперативни и финансиски предизвици во периодот на транзиција, а компанијата планирала негативни финансиски резултати во периодот на транзиција.
Кроација ерлајнс, исто така, гледа дополнителни значајни изложености на трошоци во околности кои во голема мера се надвор од нивна контрола. Меѓу другото, оттаму наведуваат дека неколкупати со зголемени доцнења се одложува испораката на два нови авиони Ербас А220, кои требаше да бидат испорачани пред почетокот на летната сезона 2024 година, на што се приспособени активностите поврзани со нивното прифаќање.
Првиот авион Ербас А220 започна со комерцијални летови на 6 август 2024 година, а вториот го направи својот прв лет на 27 декември. Тие, исто така, го истакнуваат продолжувањето на сезоната за одржување на базата за флотата на Ербас и Q400.
Задоцнетите испораки и продолжената работа во хангари бараа ангажирање на дополнителни, значително поскапи авиони на краткотраен закуп (влажен закуп) со цел да се постигне планираниот распоред на летови, да се зачуваат местата на аеродромот и да се одржи довербата на патниците, се наведува во финансискиот извештај.
