Француската влада најави дека следниот месец повеќе од двојно ќе го зголеми т.н данок на солидарност на авио билетите, што ќе доведе до зголемување на цените на летовите.
Така, данокот за летови во економска класа на кратки релации во Франција или Европа треба да се зголеми од 2,63 евра на 7,40 евра, објави Гардијан.
Надоместокот за летови во економска класа на средни растојанија ќе се зголеми на 15 евра, а за релации поголеми од 5.500 километри на 40 евра.
Ќе се зголеми и таксата за деловните билети и билетите за прва класа на 30 евра за летови на кратки релации, 80 евра за летови на средни релации и 120 евра за летови на долги релации.
Домашната авиокомпанија „Ер Франс“ го критикуваше потегот како неодговорен, а ирската нискобуџетна компанија „Рајанер“ се закани дека ќе го намали бројот на летови за Франција, објави „Гардијан“.
Француската влада тврди дека зголемувањата се оправдани и на еколошка и на финансиска основа, но критичарите велат дека тие ќе ја поткопаат способноста на Франција да се натпреварува на глобално ниво.
Се очекува авиокомпаниите да ги пренесат трошоците за зголемување на даноците на патниците, но Ер Франс проценува дека тоа ќе чини околу 100 милиони евра во време кога авиокомпанијата сè уште се опоравува од загубите предизвикани од пандемијата Ковид.
Оваа мерка е дел од нацрт-законот за буџетот за 2025 година, чија цел е намалување на растечкиот дефицит во француската каса.
