Италијанците годишно трошат 24 милијарди евра за нега на телото, вклучувајќи третмани за убавина, фризерски услуги и разни козметички производи.
Само во козметичкиот сектор потрошувачката е зголемена за 31,5 отсто во последните десет години, објави италијанското здружение за еко-дерматологија Skineco (Skineco), пренесува Ansa.
Минатата година секое италијанско семејство потрошило во просек по 929 евра за убавина и нега на телото.
Од нив, 12,5 милијарди евра се наменети за козметички производи, вклучувајќи средства за хигиена, производи за лице, коса и парфеми.
Се очекува оваа година во козметичкиот сектор таа бројка да достигне 13,5 милијарди евра, што претставува зголемување од осум отсто во однос на претходната година.
Италијанците посветуваат посебно внимание на негата на косата, па така минатата година се потрошени повеќе од една милијарда евра за производи за коса, а речиси 9,8 милијарди евра за фризерски услуги, што е во просек речиси 380 евра годишно по семејство.
„Додека меѓу 80 и 85 отсто од мажите и 35 до 40 отсто од жените имаат проблеми со косата, 44 отсто од мажите во Италија имаат проблеми со опаѓање на косата“, вели Пучи Романо, претседател на здружението „Скинеко“.
