Просечната цена на тон пелети е најниска во последните три години и изнесува 350 конвертибилни марки (КМ), што е околу 180 евра за тон.
Претседателот на Здружението на сертифицирани производители на пелети во Босна и Херцеговина, Горан Ивановиќ, истакна дека состојбата со залихите на пелети е многу добра, но побарувачката во претходниот период била исклучително слаба, објавија босанските медиуми.
„Во текот на летото, претежно странски купувачи ни ја земаа робата, која годинава ја немаше, бидејќи во Европа се продаваа пелети од Јужна Америка, Азија и Украина“, вели тој.
Според него, тоа создало голем притисок на европскиот пазар.
„Затоа нашите стандардни клиенти се обратија кон производителите од споменатите делови на светот, а причината за малата побарувачка беше забраната за извоз на пелети од Босна и Херцеговина, па се уште не сме успеале да се вратиме на европскиот пазар. “, истакна Ивановиќ.
Потенцира дека сегашните цени ќе се задржат и во следниот месец, до месец и половина, што ги оцени како добри за враќање на довербата на пазарот, како и за задоволување на потребите на потрошувачите.
