По 18 години чекање, Рим конечно ќе добие илјадници нови такси возила, изјави денеска градоначалникот на Рим, Роберто Гуалтиери.
Тој нагласи дека со тоа ќе се стави крај на големиот недостиг на таксисти, поради што туристите и локалните жители редовно чекаат долго време за превоз, пренесе Ројтерс.
Рим и другите италијански градови имаат многу помалку такси возила од многу слични европски градови, делумно затоа што моќните такси лоби групи се спротивставуваат на обидите да го зголемат нивниот број или целосно да го прифатат доаѓањето на конкурентите како што е Uber.
Сепак, Гуалтиери изјави за Ројтерс дека неговата канцеларија следниот месец ќе распише тендери за 1.000 нови дозволи за такси и 2.000 нови Uber дозволи кои ќе бидат активни до декември, кога ќе започне Римокатоличката Света година.
Во моментов, Рим има само 7.800 такси возила, без издадени нови дозволи од 2006 година и дополнителни 1.000 приватни автомобили за изнајмување.
Спротивно на тоа, Лондон има околу 19.000 такси возила, плус 96.000 приватни возила за изнајмување, според бројките од 2020 година, додека Париз има 18.500 такси возила и најмалку 30.000 дозволи за приватни возила.
