Рускиот претседател Владимир Путин порача дека азиско-пацифичкиот регион станува еден од главните центри на светската економија, истакнувајќи ја неговата сè поголема улога во глобалното производство, трговија и инвестиции.
Говорејќи на деловен форум во рамките на самитот на АПЕК во Шенжен, Кина, Путин посочи дека земјите од овој регион денес имаат значително поголемо економско и технолошко влијание на светско ниво.
Според податоците што ги изнесе рускиот претседател, економиите членки на АПЕК создаваат повеќе од 60 проценти од глобалниот бруто-домашен производ, опфаќаат 36 проценти од светското население и учествуваат со околу половина во глобалната трговија со стоки. Нивниот удел во светската трговија со услуги изнесува 35 проценти.
Путин оцени дека азиските економии направиле значителен развоен исчекор, преминувајќи од статусот на светски производствени центри кон економии кои сè повеќе ги движат иновациите и технолошкиот развој. Тој додаде дека регионот привлекува повеќе од 60 проценти од глобалните странски директни инвестиции.
Во своето обраќање, рускиот претседател се осврна и на економските резултати на Русија, наведувајќи дека нејзиниот БДП во последните три години пораснал за повеќе од 10 проценти. Тој оцени дека инфлацијата е под контрола, а јавниот долг, кој изнесува околу 17 проценти од БДП, е меѓу најниските во светот.
Путин истакна дека Русија успеала да се приспособи на меѓународните санкции и дека тие не го запреле економскиот раст на земјата. Најави и подготвеност за споделување технологии со партнерите од азиско-пацифичкиот регион, особено во областа на дигиталната трансформација и вештачката интелигенција.
Истовремено, тој упати критики кон Европската Унија, оценувајќи дека европската економија губи индустриски капацитети и конкурентност, додека растат буџетските дефицити, задолжувањето и инфлацијата. Според него, европските компании и граѓани се соочуваат со сè поголем економски притисок.
Рускиот претседател го оцени Шенжен како пример за брзата трансформација на Кина и развојот на современите економски центри.
Неговото учество на деловниот форум го означи и почетокот на посетата на Кина, во чии рамки е предвидено и учество на трилатерална средба со кинескиот и американскиот претседател.
