Кинескиот град Шенжен е целосно подготвен да биде домаќин на 33. Самит на лидерите на Азијско-пацифичката економска соработка (АПЕК), кој ќе се одржи во среда и четврток. Градот ги заврши подготовките, со посебен акцент на технологијата, иновациите и услугите за странските делегации и посетители.
Шенжен ќе биде трет кинески град домаќин на овој собир, по Шангај во 2001 и Пекинг во 2014 година. Овогодинешниот самит се одржува под мотото „Градење азиско-пацифичка заедница за заеднички просперитет“, со фокус на отвореноста, иновациите и соработката.
Градските власти соопштија дека сите локации предвидени за одржување на настанот се подготвени, а биле спроведени и целосни проби. На девет гранични премини, вклучувајќи воздушни, поморски, копнени и железнички, воспоставени се посебни канали за пристигнување на делегатите.
За полесно движење на странските гости, низ градот се стандардизирани повеќе од 100.000 натписи на странски јазици, а поставени се и над 7.000 уреди за превод со вештачка интелигенција. Странските посетители ќе можат да плаќаат за возење со метрото со банкарски картички издадени во странство, како и да подигнуваат готовина од повеќе од 3.000 банкомати.
Во организацијата се вклучени 1.360 волонтери ангажирани за самитот, како и десетици илјади градски волонтери.
Подготовките ја отсликуваат и технолошката моќ на Шенжен, кој важи за еден од најголемите кинески центри за иновации и производство. Во градот се развија глобално познати компании како Huawei, BYD, Tencent и DJI.
Економијата на Шенжен во 2025 година достигнала вредност од 3,87 билиони јуани, односно околу 580 милијарди долари. Инвестициите во истражување и развој изнесувале 7,1 отсто од БДП, што е највисок удел меѓу кинеските градови втора година по ред.
Силната индустриска база е проследена и со раст на меѓународната трговија. Во првите девет месеци од 2026 година, трговската размена на Шенжен со земјите членки на АПЕК пораснала за 40 отсто на годишно ниво, што претставува речиси 70 отсто од вкупната надворешна трговија на градот.
Компаниите од Шенжен во истиот период инвестирале 4,1 милијарда долари во економиите на земјите од АПЕК. Тоа е повеќе од 60 отсто од вкупните инвестиции на градот во странство.
Според податоците на царинските власти, во првите десет месеци од 2026 година увозот и извозот на Шенжен достигнале 5,25 билиони јуани, со што градот стана првиот во континентална Кина чија надворешнотрговска размена надминала пет билиони јуани.
Особено силен раст бележи увозот. Во првите три квартали тој достигнал 2,24 билиони јуани, што претставува зголемување од 70,1 отсто. Истовремено, извозот на производи како 3Д-печатачи, дигитални камери и паметни телефони пораснал за 15,5 отсто.
Кинеските претставници очекуваат самитот дополнително да ги зајакне трговските и инвестициските врски во регионот, но и да отвори нови можности за меѓународна соработка, особено во областа на технологијата и иновациите.
Извор: China Daily
