Европската индустрија се соочува со нов бран отпуштања, а меѓу најпогодените се автомобилските производители и компаниите што произведуваат делови за автомобили. Слабата побарувачка, високите трошоци за производство, конкуренцијата од Кина и забавената транзиција кон електрични возила ги принудуваат големите компании да ги намалуваат трошоците и да ги реорганизираат своите бизниси.
Според податоците објавени од „Анадолу“, повеќе европски компании веќе најавиле укинување на десетици илјади работни места, а процесот ги опфаќа и банкарството, телекомуникациите, транспортот и тешката индустрија.
Еден од најголемите примери е германскиот автомобилски гигант „Фолксваген“, чии планови за реструктурирање предвидуваат намалување на околу 100.000 работни места на глобално ниво до 2030 година, вклучително и претходно најавените отпуштања.
Притисокот се чувствува и кај производителите на автомобилски делови. Германскиот „Бош“ најави намалување на повеќе од 13.000 работни места, додека компанијата ZF Friedrichshafen планира да укине околу 14.000 позиции.
Се затвораат и фабрики
Дополнителен удар за европската индустрија е најавата на германскиот производител на автомобилски компоненти „Шефлер“ дека ќе укине 3.460 работни места и ќе затвори пет производствени локации во Европа – четири во Германија и една во Белгија.
До 2028 година, околу 2.660 работни места треба да бидат укинати во Германија. Компанијата очекува мерките да ѝ донесат годишни заштеди од околу 300 милиони евра до 2030 година.
Притисокот се прелева и врз „Мерцедес-Бенц“. На 12 ноември компанијата соопшти дека ги суспендира сите понатамошни инвестиции во своите германски фабрики и ги разгледува можностите за нивно затворање, откако не успеала да постигне договор со синдикатите за намалување на трошоците за работна сила.
Отпуштања и надвор од автомобилскиот сектор
Проблемите не се ограничени само на автомобилската индустрија. Францускиот производител „Рено“ планира да ја намали глобалната инженерска работна сила за 2.400 позиции, додека германскиот индустриски концерн „Тисенкруп“ најави планови за укинување на 11.000 работни места.
Во телекомуникацискиот сектор, „Водафон“ најави намалување на околу 2.300 работни места во Германија во следните две години, што претставува речиси една петтина од неговиот тамошен персонал.
Компаниите како причини ги наведуваат високите трошоци, потребата од поефикасно работење, автоматизацијата и сè поголемата употреба на вештачката интелигенција.
Европските индустриски компании така се соочуваат со двоен предизвик: да инвестираат во нови технологии и истовремено да ги намалуваат трошоците за да останат конкурентни на светскиот пазар.
