Индиската групација Tata Motors обезбеди прифаќање на својата понуда за преземање на италијанскиот производител на камиони Iveco од страна на 87,8 отсто од акционерите, со што е надминат прагот од 80 отсто предвиден во понудата.
Според соопштенијата на двете компании, Tata Motors сега поседува 89,42 отсто од обичните акции на Iveco.
Понудата, која започна на 7 септември, заврши на 26 октомври. Tata Motors на 9 октомври ја зголеми понудената цена од 14,10 на 14,40 евра по акција, пренесува Pluton Logistics.
Конечните резултати ќе бидат објавени пред почетокот на тргувањето на берзата на 29 октомври, додека Iveco најави дека понудата повторно ќе биде отворена од 2 до 6 ноември.
Tata Motors во јули 2025 година постигна договор за купување на бизнисот со комерцијални возила на групацијата Iveco, во трансакција вредна 3,8 милијарди евра. Договорот не ја опфаќа одбранбената дивизија на Iveco, која е изземена од трансакцијата поради нејзиното стратешко значење за националната безбедност.
Да потсетиме, италијанската влада го одобри преземањето со примена на таканаречените „златни овластувања“, механизам што ѝ овозможува на државата да постави посебни услови за трансакции поврзани со стратешки важни компании и сектори.
Меѓу тие услови се заштитата на производствените капацитети и технолошкото знаење во Италија, задржувањето на оперативното седиште во земјата, како и континуитетот на производството и вработувањето во главните погони на Iveco. Целта на мерките е да се овозможат странски инвестиции, а истовремено да се заштитат индустриските интереси на Италија.
