Германскиот производител на автомобили Audi, кој работи во рамките на групацијата Volkswagen, оствари нето-добивка од 95 милиони евра во третото тримесечје од оваа година, што е за 87 отсто помалку во споредба со истиот период минатата година.
Според објаснувањето на компанијата, врз послабите деловни резултати влијаеле намалената побарувачка на кинескиот пазар, сè посилната конкуренција и американските царини, пренесува SEEbiz.
Од јули до септември Audi испорача 319.225 возила, што е речиси 20 отсто помалку во споредба со истиот период претходната година. Во исто време, приходите се намалија за 18,5 отсто, на 12,9 милијарди евра, соопшти компанијата.
Податоците укажуваат на натамошно влошување на финансиските резултати на групацијата Audi, во чиј состав, покрај истоимениот производител на автомобили, се наоѓаат и луксузните брендови Lamborghini и Bentley, како и производителот на мотоцикли Ducati, пренесе германската новинска агенција dpa.
Во првите девет месеци од оваа година Audi оствари нето-добивка од 1,22 милијарди евра, додека приходите изнесуваа 42 милијарди евра. Во споредба со истиот период во 2025 година, нето-добивката е намалена за речиси 41 отсто, а приходите за приближно 13 отсто.
Компанијата во меѓувреме ја намали и прогнозата за работењето за целата година. Сепак, финансискиот директор на Audi, Јирген Ритерсбергер (Jürgen Rittersberger), изрази умерен оптимизам, оценувајќи дека ревидираните проекции укажуваат на можност за подобрување на деловните резултати во завршницата на годината.
