Осумнаесет членови на екипажот на контејнерскиот брод „Contship Jet“ се спасени откако пловилото беше погодено од три поморски дрона во Црното Море, на околу 16 наутички милји од брегот на Бугарија.
Според информациите што ги пренесуваат регионалните медиуми, при нападот бродот претрпел три пробивања на трупот, а и покрај оштетувањата, сè уште плови. Сепак, пловилото е значително навалено.
Инцидентот предизвика дополнителна загриженост поради товарот што го превезувал бродот. Повеќе од 20 контејнери со опасни материи паднале во морето. Меѓу нив имало литиум-јонски батерии, киселини, запаливи течности и други потенцијално опасни супстанции.
Бугарските власти ги предупредија поморските служби и учесниците во пловидбата за можните ризици што ги претставуваат контејнерите во морето.
Првичната проверка на морската површина во близина на Калиакра не покажала видливи знаци на загадување. Сепак, надлежните планираат да земат примероци од водата за лабораториски анализи, со цел да утврдат дали има последици врз морската средина.
Засега не е утврдено од каде потекнуваат дроновите што го погодиле бродот.
Во одделен инцидент, на бугарскиот брег кај Царево биле пронајдени остатоци за кои се претпоставува дека потекнуваат од руски дрон од типот „Геран“. Бугарското Министерство за одбрана соопшти дека остатоците се собрани и пренесени во поморска база.
