Кинеската компанија „Техрон Аутомотив“ на 18 ноември ќе отвори фабрика во Инѓија, Србија, во која во првата фаза се инвестирани 20 милиони евра.
Во производствениот погон со површина од 4.500 квадратни метри ќе се изработуваат пластични компоненти со вбризгување за електрични возила, а првите испораки за европските купувачи се очекуваат кон крајот на февруари 2027 година.
Како што соопшти Општина Инѓија, фабриката е во завршна фаза на изградба, а развојот на производството е планиран во три фази. Според најавите на претставниците на компанијата, ова е првата инвестиција на „Техрон“ надвор од Кина.
Градоначалникот на Инѓија, Марко Гашиќ, се сретнал со претставници на компанијата, со кои разговарал за завршувањето на работите, инфраструктурните потреби на фабриката и идните инвестиции.
„Ова е првата инвестиција на ‘Техрон’ надвор од Кина и сè што ќе се произведува ќе се извезува во Германија, во ‘Фолксваген’“, изјави Гашиќ.
Фабриката ќе работи со висок степен на автоматизација и дигитализација, со значително учество на високообразован кадар. Компанијата најавила и дека на раководните позиции ќе бидат ангажирани исклучиво локални стручњаци.
Отворањето на погонот го означува почетокот на планираниот развој на „Техрон Аутомотив“ во Инѓија, а дополнителни инвестиции се очекуваат во следните фази од проектот.
