Непријатно изненадување ги дочекало патниците на летот на австралиската авиокомпанија Qantas од Перт до Рим, откако дел од нив се пожалиле дека ги касаат стеници во текот на летот. Инцидентот довел до приземјување на авионот и откажување на повратниот лет кон Австралија.
Проблемот бил пријавен на летот QF5, кој на 9 октомври летал од Перт до Рим. Патниците што седеле во економската класа се пожалиле на каснувања од инсекти, по што на некои од нив, по медицински совет, им биле поделени антихистаминици за ублажување на чешањето.
По пристигнувањето во Италија, авионот „Боинг 787 Дримлајнер“ бил повлечен од сообраќај за да се изврши темелно чистење на кабината. Поради тоа, повратниот лет од Рим до Перт, планиран за 10 октомври, бил откажан.
Патниците биле сместени во хотел и пренасочени на други летови, а дел од нив морале да чекаат до 48 часа за да продолжат кон својата дестинација.
Од Qantas им се извиниле на патниците за откажувањето и соопштиле дека екипите за одржување извршиле темелно чистење на авионот откако проблемот бил откриен на неколку седишта во економската класа.
Компанијата наведува дека кабините редовно се чистат, а авионите се подложуваат и на дезинфекција на секои 50 дена. Сепак, стениците се особено тешки за отстранување бидејќи можат да се кријат во тесните простори на седиштата и да се пренесуваат преку облеката и личниот багаж на патниците.
Експертите предупредуваат дека ваквите инсекти можат да бидат тешки за откривање и искоренување, дури и во средини со редовни процедури за чистење. Засега не е утврдено како точно стениците се нашле во авионот.
Инцидентот повторно го отвори прашањето за хигиената во авионите и предизвиците со кои се соочуваат авиокомпаниите кога ќе се појави проблем што бара специјализирано чистење и привремено повлекување на леталото од употреба.
