Португалскиот остров Мадеира се подготвува за рекордна година во крстосувачкиот туризам. До крајот на 2026 година се очекува островот да го посетат околу 820.000 патници со крузери, а во пристаништата да пристигнат вкупно 349 бродови.
Доколку прогнозите се остварат, ова ќе биде првпат бројот на патници од крузери да надмине 800.000 во една година. Во текот на 2025 година Мадеира пречекала околу 746.000 патници и 331 крузер.
Особено интензивен е октомври, за кој се планирани 33 пристигнувања на крузери и повеќе од 75.000 патници. Растот се поврзува со зголемениот интерес на туристичките компании за островот, кој е популарна станица на атлантските маршрути на крузерите.
Мадеира, позната по благата клима, спектакуларните пејзажи и главниот град Фуншал, станува сè попривлечна дестинација за туристите кои патуваат со крузери. Сепак, конечните бројки ќе зависат од тоа дали сите планирани пристигнувања ќе се реализираат.
