Швајцарската банка УБС е единствената европска банка меѓу десетте финансиски институции со најнапредна примена на вештачката интелигенција, според новото рангирање на компанијата „Евидент“.
УБС се искачи на шестото место, додека првата позиција ја задржа американската „ЏејПи Морган Чејс“. На второто место е „Капитал Уан“, трет е „Ројал Банк оф Канада“, а четврта е австралиската „Комонвелт Банк“.
„Ејч-Ес-Би-Си“, која минатата година беше осма, сега падна на 11. место и со тоа остана надвор од Топ 10.
Истражувањето опфаќа 50 големи банки од Северна Америка, Европа и азиско-пацифичкиот регион. Банките се оценуваат според бројот на АИ експерти, иновациите, инвестициите, стратегијата на раководството и начинот на кој управуваат со ризиците поврзани со технологијата.
Банките сè повеќе ја користат АИ за откривање измами, развој на софтвер, проценка на кредити и помош при советување на клиентите.
Според истражувањето, примената на АИ во банкарскиот сектор во последната година напредувала речиси трипати побрзо отколку во просекот во претходните три години.
На листата се наоѓаат и „Банк оф Америка“, „Ситигруп“, „Морган Стенли“ и „Велс Фарго“.
