Администрацијата на Доналд Трамп побара од Германија и Франција да ги намалат вонредните резерви на дизел за да се ублажи растот на глобалните цени на горивата.
Според три лица запознаени со разговорите, Вашингтон им порачал на европските сојузници дека во спротивно би можеле да се соочат со можна американска забрана за извоз на дизел. Со тоа се засилува притисокот врз Европа, додека Трамп разгледува мерки за намалување на цените на горивата во САД пред изборите за Конгресот на 3 ноември.
Извор од една европска престолнина изјави дека САД побарале од Европската Унија во следните шест месеци да ослободи 120 милиони барели дизел. Според податоците на Европската комисија, САД во август обезбедиле околу половина од увозот на дизел во ЕУ, која стана позависна од американското гориво по забраната за увоз од Русија и нарушувањата во снабдувањето од Блискиот Исток поради војната во Иран.
Американски претставник за „Ројтерс“ изјави дека соработката со Вашингтон е во интерес на Европа.
„Во најдобар интерес на Европа е да работи со САД додека бараме повеќе начини за зголемување на понудата на рафинирани производи и намалување на трошоците за потрошувачите“, порача тој.
Американскиот министер за енергетика Крис Рајт во средата изјави дека наскоро очекува најави од Европа за нови количини дизел во резервите. Тој наведе дека е изгубен дел од извозот на дизел од Блискиот Исток, иако тој повторно се обновува, како и од Кина, додавајќи дека има „многу прекини“ во снабдувањето.
На прашањето во Белата куќа дали размислува за забрана на извозот, Трамп одговори: „Размислувам за тоа“.
Тој рече дека Рајт и министерот за внатрешни работи Даг Бургам сметаат дека забраната би можела да ги намали цените на дизелот, но истовремено да ги зголеми цените на други производи, вклучително и бензинот.
Цените на дизелот во САД достигнаа рекордни 6,53 долари за галон на 22 септември, пред да паднат на 6,41 долар на 30 септември, според Американската автомобилска асоцијација.
Повеќе од 20 американски трговски здруженија во писмо од 23 септември предупредија дека забраната за извоз би довела до помало производство на горива, помала понуда и повисоки трошоци за американските семејства, земјоделците и превозниците.
Портпаролот на Европската комисија Олоф Гил минатата недела можната забрана ја нарече „лоша идеја“. Францускиот претседател Емануел Макрон рече дека го предупредил Трамп дека забраната „би била лоша“ и дека би ги зголемила цените.
Во меѓувреме, Макрон треба да свика видеоконференција на Г7 за цените на горивата и координираното ослободување на резервите со Меѓународната агенција за енергија.
