Украинскиот претседател Володимир Зеленски ги бранеше нападите врз руските рафинерии за нафта и порача дека „нашите животи се поважни од цената на енергенсите“.
Зеленски ова го изјави во интервју на маргините на Генералното собрание на Обединетите нации, одговарајќи на прашањето дали американскиот претседател Доналд Трамп вршел притисок врз него да ги прекине нападите поради глобалниот раст на цената на дизелот.
Во разговорот со главната уредничка на „Волстрит џурнал“, Ема Такер, Зеленски потврди дека разговарал со Трамп за оваа тема.
„Денес не разговаравме за тоа, но разговаравме телефонски. Ја допревме темата за дизелот. Реков: гледајте, нашите животи се поважни од цената на енергенсите“, рече Зеленски.
Украинскиот претседател истакна дека нападите врз руските енергетски постројки ќе ги запре само доколку со Москва биде договорен прекин на огнот.
Подоцна на социјалните мрежи објави дека Киев е „подготвен за енергетско примирје ако тие не го напаѓаат нашиот енергетски систем, електричната енергија, греењето и водоснабдувањето“.
Сепак, додаде дека не е сигурен дали Русија е подготвена да го прифати таквиот предлог.
Украина во четвртокот изведе напади врз рафинерии во Русија, што предизвика проблеми со снабдувањето со гориво во одредени делови од земјата, додека Москва возврати со напади.
Еден од нападите беше насочен кон подрачјето на Нижњекамск, каде што се наоѓаат неколку големи рафинерии. Во друг напад со дрон беше погодена рафинерија во Славјанск на Кубањ, во руската област Краснодар, во близина на Крим.
Трамп ги поврза нападите врз руските енергетски постројки со овонеделниот раст на цените на дизелот на светскиот пазар. Просечната цена на дизелот во вторникот достигна 6,27 долари, што, според наводите во текстот, е највисоко ниво досега.
Бидејќи дизелот е клучно гориво за јавниот превоз и товарниот сообраќај, се очекува растот на цените да влијае и врз цените на основните производи.
Трамп претходно овој месец го повика Зеленски да „престане да го уништува дизелот во Русија“.
„Има многу други цели. Не напаѓајте го дизелот бидејќи тоа штети, тоа му штети на целиот свет“, рече Трамп.
Во меѓувреме, руските сили ги засилија нападите врз Украина со балистички ракети и дронови, а мета е и украинската електроенергетска мрежа во пресрет на зимата.
Украинскиот министер за надворешни работи Андриј Сибиха ја обвини Русија за систематски напади врз места каде што се собира голем број луѓе. Како што наведе, целта на таквите напади е зголемување на бројот на жртви, ширење страв и вршење притисок врз украинското општество.
