Converse ја отстрани објавата од Instagram и се извини по жестоките реакции на рекламата со К-поп пејачката Карина, за која критичарите тврдеа дека потсетува на расистичка симболика.
На фотографијата Карина носела здолниште и држела патики Chuck 70 X, а дел од публиката оценил дека триаголниот бел облик создаден од осветлувањето потсетува на капуљача на Ку-клукс-кланот. Критиките дополнително се засилиле бидејќи некои корисници на социјалните мрежи навеле дека положбата на патиките во нејзините раце изгледа како стапала на жртва на линчување.
Компанијата, која е во сопственост на Nike, соопшти дека рекламата ја отстранила по реакциите во јавноста.
„Жал ни е. Разбираме зошто оваа фотографија е длабоко вознемирувачка и признаваме дека направивме грешка. Ја отстранивме од нашите канали и работиме на тоа да биде отстранета секаде каде што се појавила. Ова не требаше да се случи и ќе бидеме подобри“, наведоа од компанијата.
Converse, со седиште во Бостон, во неделата не одговори на дополнителните прашања за тоа како ги проверува рекламите пред објавување и како бил одобрен спорниот визуелен материјал.
Случајот предизвика повици за бојкот на компанијата и барања одговорните за рекламата да добијат отказ, додека други коментатори тврдеа дека спорната порака не била намерна.
Адвокатот за граѓански права Ли Мерит порача дека извинувањето не е доволно.
„Постојано го водиме истиот разговор бидејќи компаниите постојано паѓаат на истиот тест. Да бидеш подобар значи да го препознаеш проблемот пред емитувањето, а не откако ќе бидеме навредени“, изјави тој.
Ова не е изолиран случај во малопродажбата и модната индустрија. Големи трговски синџири и модни брендови и претходно повлекувале производи и упатувале извинувања поради обвинувања за расна нечувствителност, вклучително и Target, кој минатиот месец повлече детски костим за Ноќта на вештерките по слични реакции во јавноста.
