Американските земјоделци во екот на сезоната на жетва плаќаат рекордно високи цени за дизел, што ги зголемува трошоците за производство и транспорт и отвора простор за поскапување на основните прехранбени производи.
Во североисточниот дел на Мисури, земјоделката Ади Јодер, која одгледува пченка, соја и говеда, од средината на септември до крајот на октомври користи два комбајни, три камиони и повеќе трактори за жетвата и транспортот на земјоделските производи.
Бидејќи еден комбајн троши околу 1.300 литри гориво, таа вели дека единствено што ѝ преостанува е да ги намалува другите трошоци.
Во југоисточниот дел на Јужна Дакота, земјоделецот Дру Петерсон, кој одгледува соја, пченка и говеда, очекува оваа сезона само за гориво за еден комбајн да издвојува до 1.500 долари дневно, што е двојно повеќе од минатата година.
„Не можете едноставно да кажете дека дизелот е скап и дека нема да жнеете. Едноставно мора да го вклопите тоа во буџетот“, изјави Петерсон.
Според податоците на американската Управа за енергетски информации, просечната цена на дизелот во САД оваа недела достигна рекордни 6,29 долари за галон, што е за 68 отсто повеќе од пред една година, кога изнесувала 3,74 долари.
Ројтерс наведува дека глобалните резерви на гориво се дополнително под притисок поради војната меѓу САД и Израел против Иран, како и поради украинските напади врз руските рафинерии.
Економистот Дејвид Ортега од Државниот универзитет во Мичиген предупреди дека поскапиот дизел ги зголемува трошоците во сите делови од синџирот на снабдување со храна – од жетвата на фармите до транспортот со камиони до продавниците.
Особено се погодени производите за кои е потребен транспорт во ладен режим, како овошјето, млечните производи и месото.
