Банката на Јапонија ја зголеми референтната каматна стапка од 1 на 1,25 отсто, достигнувајќи го највисокото ниво од 1995 година. Одлуката беше донесена со седум гласа „за“ и два „против“.
Очекуваниот потег претставува продолжување на постепеното оддалечување на Јапонија од повеќедецениската политика на исклучително ниски каматни стапки.
Ова е шесто зголемување на каматните стапки откако Банката на Јапонија започна со затегнување на монетарната политика во 2024 година. Тогаш земјата ја напушти политиката на негативни каматни стапки.
Одлуката доаѓа во услови на зголемени глобални инфлациски притисоци, особено поради растот на цените на енергенсите поврзан со војната во Иран. И другите големи централни банки, меѓу кои американските Федерални резерви и Европската централна банка, неодамна ги зголемија каматните стапки.
Јапонија е особено зависна од увозот на енергенси, па повисоките цени на нафтата и гасот директно влијаат врз јапонската економија и трошоците за живот.
Основната инфлација во август изнесуваше 1,7 отсто на годишно ниво, што е нешто под целта од 2 отсто на централната банка. Индексот што ги исклучува свежата храна и горивата порасна за 1,9 отсто, што укажува на одржливи инфлациски притисоци.
Гувернерот на Банката на Јапонија, Казуо Уеда, порача дека идните зголемувања на каматните стапки ќе зависат од движењето на инфлацијата и економските услови. Тој предупреди дека зголемените трошоци за енергија би можеле дополнително да влијаат врз потрошувачките цени.
И покрај зголемувањето на каматната стапка, јенот ослабе по одлуката, бидејќи инвеститорите не добија јасен сигнал дека следуваат брзи нови зголемувања.
