Цените на германските бензински пумпи вртоглаво растат, па така литар дизел или бензин од вчера чини околу 20 центи повеќе.
Причината е тоа што јеменската бунтовничка група Хути го држи теснецот Баб ел Мандеб како заложник, пренесуваат германските медиуми. Милитантите се закануваат со трајна блокада.
Нафтените компании веднаш во цената го вклучуваат потенцијалниот раст на цената на суровата нафта, иако со суровата нафта од типот „Брент“ во сабота не се тргува на берзите.
Теснецот меѓу воено разорениот Јемен и африканскиот континент ги поврзува Европа и Азија по морски пат. Обединетите нации проценуваат дека во 2023 година речиси девет отсто од вкупниот обем на поморската трговија минувал низ Баб ел Мандеб.
Откако Хутите зазедоа стратешки позиции во Јемен долж теснецот, бродскиот сообраќај сега се соочува со големо заобиколување околу опасниот Рт Добра Надеж, а со тоа и околу целиот африкански континент.
Последица од тоа би било нагло зголемување на транспортните трошоци. До тоа сè уште не дошло, но цената веќе сега ја плаќаат потрошувачите во Германија.
Бидејќи бензинските пумпи смеат да ги зголемат цените на горивото само еднаш дневно, на пладне, во саботата наутро на некои пумпи се создале долги редици.
На ниво на цела Германија, цената на литар дизел точно на пладне се зголемила на 2,56 евра. Претходно била околу 20 центи пониска.
Иако скокови на цените од ваков обем може да се забележат и во други денови, цената обично набрзо повторно се намалува.
Меѓутоа, во саботата останала висока и во 13 часот. Секој што, не знаејќи што ќе се случи, тогаш наточил гориво на најскапата дизел-пумпа во Берлин, Aral на автопатот А115, платил дури 2,789 евра за литар.
