Пред седиштето на Делегацијата на Европската Унија во Сараево денеска ќе се одржи протест на професионални возачи поради ограничувањето на нивниот престој во Шенген-зоната.
Од Конзорциумот „Логистика“ најавија дека возачите во текот на денот накратко ќе го забавуваат сообраќајот во главниот град на Босна и Херцеговина. Собирот е предвиден во 11 часот пред зградата на Парламентарното собрание на БиХ, по што протестната колона ќе се движи низ улиците на Сараево кон седиштето на Делегацијата на ЕУ.
Централниот протест пред Делегацијата на ЕУ е предвиден од 12 до 14 часот.
Проблемот со ограничениот престој не ги засега само превозниците од БиХ. Денеска синхронизирани протести се одржуваат и во Србија, Црна Гора и Северна Македонија.
Превозниците бараат Европската Унија да донесе конкретно решение и условите за престој во Шенген-зоната да ги прилагоди на спецификите на нивната професија. Тие укажуваат дека во земјите од Шенген не престојуваат туристички, туку поради работата и транспортот на стоки, поради што сметаат дека не треба да бидат третирани на ист начин како туристите и другите приватни посетители.
Протестите се одржуваат во пресрет на состанокот на Европската комисија закажан за 1 септември, на кој треба да се разговара и за статусот на професионалните возачи од Западен Балкан.
Превозниците најавуваат дека, доколку од Брисел не стигне позитивно решение, ќе преземат дополнителни мерки. За 14 септември се најавени протести на граничните премини кон Европската Унија доколку проблемот не биде решен.
