Македонските превозници денеска од 12 до 14 часот ќе протестираат пред седиштето на Делегацијата на Европската Унија во Скопје, барајќи решение за проблемот со ограничениот престој на професионалните возачи во Шенген-зоната.
Протестот го организира домашната транспортна асоцијација „Макам-транс“ како предупредување во пресрет на утрешниот состанок на работната група во Брисел, од кој превозниците очекуваат конкретно решение за нивниот статус.
Во текот на протестот пред Делегацијата на ЕУ ќе бидат паркирани околу 20 товарни возила од Скопје, а ќе присуствуваат сопственици на транспортни компании, возачи и други вработени од повеќе делови на земјава. Истовремено, протести се најавени и во Србија, Босна и Херцеговина и Црна Гора.
Проблемот произлегува од правилото 90/180, според кое државјани на трети земји можат да престојуваат во Шенген-зоната најмногу 90 дена во кој било период од 180 дена. Од „Макам-транс“ велат дека и по седум месеци проблемот не е надминат и бараат прашањето да биде ставено на дневен ред на состанокот во Брисел.
Според генералната секретарка на „Макам-транс“, Биљана Муратовска, неизвесноста создава сериозни проблеми за превозниците, особено поради различното толкување на правилото на граничните премини. Од асоцијацијата информираат дека околу половина од возачите одбиваат да возат бидејќи немаат сигурност дали и под кои услови ќе можат да се вратат во Шенген-зоната.
Од Министерството за транспорт, пак, велат дека се работи на решавање на проблемот преку билатерални договори со земјите од Шенген-зоната. Министерот за транспорт Александар Николоски неодамна посочи дека Македонија веќе има договори со Швајцарија, Хрватска и Романија, а се работи и на договори со Австрија, Словенија и Германија, со цел да се покријат главните транспортни рути.
Со проблемот се соочуваат околу 17.000 професионални возачи од Македонија, додека на ниво на Западен Балкан бројката е околу 100.000. Превозниците во јануари веќе ги блокираа товарните делови на повеќе гранични премини, барајќи да бидат изземени од правилата поврзани со новиот систем за контрола на влез и излез во ЕУ.
Доколку на утрешниот состанок во Брисел не биде најдено преодно решение, превозниците најавуваат можност за нови протести на граничните премини на 14 септември.
