Проектот за рудник за бакар во Иловица добива поддршка од жители на локалната заедница, кои во инвестицијата гледаат можност за економско заживување на регионот и отворање нови работни места.
Според нив, една од најголемите придобивки би била создавањето добро платени работни места за младите, што би можело да придонесе тие да останат во југоистокот и својата иднина да ја градат во регионот.
Никола Стаменов, поранешен претседател на Федерацијата на фармери и член на иницијативата „И здравје и работа“, за Канал 5 ТВ истакна дека предуслов за ваков развој е доследното почитување на еколошките стандарди.
Според него, со примена на светските стандарди за заштита на животната средина, од реализацијата на проектот може да има бенефит и државата.
„Ние сме за отворање на рудникот за бакар во Иловица. Имаше неколкумина кои беа противници за отворањето, со напомена дека ќе се загадела животната средина, ќе се загаделе воздухот и подземните води, почвата… Меѓутоа, со најсовремената европска и светска технологија, имаме целосна гаранција дека до тоа нема да дојде“, изјави Стаменов како жител на Иловица.
Тој и претходно има истакнато дека поради бесперспективност неговите деца заминале во странство, а во селото останале постарите жители. Во своите јавни излагања, Стаменов апелираше надлежните институции да ги слушнат оние што го поддржуваат отворањето на рудникот и повика да се формира независно мониторинг тело кое ќе го контролира ископот на рудата и дали тоа се врши според пропишаните стандарди.
Како жител на Иловица, Стаменов истакна дека има повеќемина кои сметаат дека покрај можностите за вработување се отвораат и големи можности за економски бенефит и станува збор за инвестиција која ќе донесе пораст на бруто домашниот производ, нова инфраструктура во населените места, а ќе имаат бенефит и општините и регионот и државата.
Од локалната иницијатива „И здравје и работа“ веќе нагласија дека во Македонија дебатата за рударството не треба да се сведе на изборот „или екологија или рударство“.
„Дебатата треба да се води околу тоа дали можеме да имаме рударство кое ги почитува највисоките еколошки стандарди, а истовремено да создава економска вредност за државата и граѓаните. Одговорот треба да го дадат науката, стручната јавност и институциите, а не стравот и политичките поделби“, истакнаа од „И здравје и работа“.
Според иницијативата, критичката јавност е неопходна, но критиката не смее да значи однапред донесен заклучок дека секој рударски проект е опасен.
„Никој не треба од јавноста да бара слепо да верува во кој било рударски проект. Но, исто така, никој не треба да бара од јавноста да верува во обвинувања кои не се поткрепени со стручни анализи и релевантни докази. За секој проект треба да зборуваат фактите, техничката документација, научните проценки и законските процедури“, се додава во соопштението.
Претходно, повеќе домашни експерти нагласија дека во период кога расте на цената на бакарот на светските берзи, капацитетите во Иловица, но и оние од други наоѓалишта на критични минерали, се значајни и за домашната економија. Дел од нив потврдија дека современите технологии овозможуваат безбедна експлоатација на минерали, со контролирани процеси и заштита на природата. Коментирајќи го технолошкиот процес за ископ на бакарна руда во Иловица, тие велат дека таквите технолошки процеси се бенигни и не се деструктивни кон природата.
