Повеќето граѓани на Велика Британија поддржуваат воведување законски пропишана максимална температура на работните места, покажува истражување на јавното мислење спроведено од YouGov за организацијата „Пријатели на Земјата“.
Според анкетата спроведена меѓу повеќе од 2.000 полнолетни испитаници, 79 отсто од Британците сметаат дека владата треба да воведе максимална дозволена температура во затворените работни простории, пренесува Sky News.
Во Велика Британија во моментов не постојат законски пропишани минимални ниту максимални температури за работа во затворен простор.
Притисокот за промена на прописите расте поради сè почестите топлотни бранови.
Независни советници на британскиот Комитет за климатски промени претходно годинава ѝ препорачаа на владата да воведе максимална дозволена температура на работното место, со цел да ги заштити вработените и да ги поттикне работодавачите да инвестираат во системи за ладење.
Новите прописи ги поддржуваат и синдикатите.
Конгресот на британските синдикати (TUC) оцени дека земјата мора да се приспособи на климатските промени и да обезбеди „ладни и безбедни“ работни места во текот на летото. Синдикатот Unison, пак, ги повика работодавачите да им овозможат на вработените флексибилно работно време, за да работат во периодите кога температурите се пониски.
Рози Даунс, директорка за кампањи во организацијата „Пријатели на Земјата“, изјави дека ваквите мерки ќе стануваат сè поважни бидејќи топлотните бранови стануваат сè почеста појава поради климатското затоплување.
