Познатиот синџир за спортска облека и обувки JD Sports драстично ја намалува својата мрежа на продавници во Германија и Европа.
Откако компанијата најави преиспитување на своето работење на европскиот пазар, во тек е затворање на околу 30 од вкупно 100 продавници во Германија. Како главна причина за овој радикален потег раководството ги наведува значителните финансиски загуби во погодените продавници.
Постепено се открива кои продавници веќе се затворени или наскоро ќе престанат со работа, а некои од нив веќе се отстранети од официјалната интернет-страница и од пребарувачите на продавници, пишува Fenix Magazin.
Меѓу градовите во кои е потврдено затворање на продавници се Крефелд, Херне, Визбаден, Цвикау, Кил, Милхајм-Керлих, Јена, Минхен и Ашафенбург.
Во некои продавници, како онаа во Јена, во тек е голема завршна распродажба на залихите, која ќе трае до 22 август.
Сè уште не е официјално објавено кои други продавници ќе бидат опфатени со овој бран на затворања. Истовремено, компанијата го преиспитува и работењето на своите продавници во Франција.
