Американска нафтена компанија поврзана со Доналд Трамп се подготвува за истражувачко дупчење во оддалечен дел на Гренланд, иако сè уште нема официјално одобрение од локалните власти.
Во изминатите денови на источниот брег на Гренланд била доставена опрема и материјал за подготовка на дупчењето. Тоа предизвикало реакција од владата на Гренланд, која издала сериозно предупредување бидејќи за истоварувањето на опремата не била издадена потребната дозвола.
Властите нагласиле дека сите идни логистички активности поврзани со проектот мора однапред да бидат пријавени и одобрени од надлежните органи за минерални ресурси.
Зад проектот стои компанијата Greenland Energy од Тексас, основана минатата година. Нејзините раководители проценуваат дека под регионот Џејмсон Ленд би можеле да се наоѓаат резерви на нафта со потенцијална вредност од околу еден билион долари.
Компанијата планира да инвестира околу 60 милиони долари за две истражувачки бушотини.
Ситуацијата дополнително ја усложнува одлуката на Гренланд од 2021 година да престане со издавање нови лиценци за истражување на нафта поради еколошки причини. Сепак, британската компанија 80 Mile претходно обезбедила права за истражување на ова подрачје.
Според Greenland Energy, американската компанија треба да преземе мнозински удел во проектот во замена за негово финансирање. За реализација на плановите, сепак, потребно е одобрение од владата на Гренланд.
Проектот привлекува дополнително внимание и поради луѓето вклучени во него. Компанијата го ангажирала познатиот американски телевизиски водител Фил Мекгро, познат како Dr. Phil, за снимање документарна серија за проектот. Тој е и член на комисија за верски слободи формирана од администрацијата на Трамп.
На раководна позиција во компанијата е поставен и ветеран на американската морнарица кој бил ангажиран во проектот за ракетна одбрана „Златна купола“.
Случајот добива и политичка димензија поради повторените изјави на американскиот претседател Доналд Трамп за стратешкото значење на Гренланд и неговите идеи САД да воспостават контрола врз островот.
Гренланд е автономна територија во рамките на Кралството Данска, но самостојно одлучува за управувањето со своите природни ресурси.
Локалните власти сега треба да одлучат дали ќе дозволат истражувачко дупчење. Дополнителен проблем е што локацијата се наоѓа во област заштитена според Рамсарската конвенција за мочуришта, поради што евентуалното одобрување на проектот може да отвори и сериозни еколошки прашања.
