Грција ја одобри набавката на повеќеслоен систем за противвоздушна одбрана од Израел, вреден до 3,5 милијарди евра, како и набавка на различни видови беспилотни летала и воени транспортни авиони C-390 од бразилската компанија Embraer.
Грчкиот Совет за национална безбедност (KYSEA) претходно годинава даде прелиминарно одобрение за проектот, а во четвртокот ги одобри и договорите за набавка, изјави грчкиот министер за одбрана Никос Дендијас.
Грција планира да воспостави повеќеслоен систем за одбрана од балистички ракети, воздушни закани и беспилотни летала, наречен „Ахилов штит“. Основата на системот ќе ја сочинуваат израелски радари и ракети произведени од компаниите Rafael и Israel Aerospace Industries.
„Системот ќе биде целосно подготвен и оперативен во рок од 35 месеци“, изјави Дендијас.
Тој додаде дека грчките компании ќе произведуваат најмалку 25 проценти од компонентите на системот.
Во моментов, Грција за заштита на својот воздушен простор ги користи американските системи Patriot и постарите руски системи S-300.
Земјата планира до 2036 година да инвестира околу 28 милијарди евра во модернизација на своите вооружени сили.
