Просечната цена на обичниот бензин во САД падна на 3,87 долари за галон, покажуваат најновите податоци на Американската автомобилска асоцијација (AAA).
Според анализите, намалувањето на цените на горивата е поврзано со падот на цената на суровата нафта на светските пазари. Телевизијата CNN наведува дека цените на нафтата се приближиле до најниските нивоа од почетокот на конфликтот меѓу Израел и Иран, што остава простор бензинот дополнително да поевтини доколку трендот продолжи.
Во петокот, цената на брент нафтата се намали за 4,3 проценти и се спушти под 72 долари за барел, додека американската сурова нафта поевтини за 3,7 проценти, на околу 69 долари за барел.
И покрај последниот пад, просечната цена на бензинот во САД и натаму е речиси 30 проценти повисока во споредба со периодот пред воените конфликти на Блискиот Исток. Сепак, таа останува значително под овогодишниот максимум од 4,56 долари за галон.
Експертите оценуваат дека понатамошното движење на цените ќе зависи од стабилизирањето на трговските текови, обновувањето на оштетените нафтени капацитети и рестартирањето на производството во областите каде што беше прекинато поради конфликтите.
