На 6 мај 2026 година Европската Унија ќе ја усвои првата сеопфатна Стратегија против сиромаштијата. Ова е прв ваков документ на ниво на ЕУ. Неговата цел е системско искоренување на сиромаштијата. Во процесот се вклучени Европската комисија и извршната потпретседателка Роксана Минзату, како и Европската мрежа против сиромаштијата (ЕАПН), заедно со своите членки, лицата со искуство во сиромаштија и организациите кои работат со нив.
Апелираме до Брисел новата Стратегија против сиромаштијата да ги опфати и земјите кандидати за членство, вклучително и Македонија, затоа што сиромаштијата не познава граници. Исклучувањето ќе го продлабочи јазот со ЕУ, додека вклучувањето ќе обезбеди праведност, поддршка и реална шанса за подобар живот на граѓаните.
За Македонија, оваа стратегија би можела да има директно значење. Иако земјата не е членка на ЕУ, таа е кандидат. Тоа значи дека европските политики влијаат и врз неа. Во моментов, Македонија нема никаква стратегија за искоренување на сиромаштијата. Токму затоа, европската стратегија може да стане главен ориентир. Таа може да помогне во креирање домашни политики. Може да отвори пристап до финансии, како и да донесе конкретни резултати за подобрување на животот на нашите граѓаните.
Конкретно, според предлозите на ЕАПН за стратегијата, ако Македонија биде вклучена, ќе може да користи фондови како IPA по 2027 година, EaSI и ESF+. Ќе има поддршка за социјални програми, вклучително и Европската детска гаранција. Ќе треба да развие национални и локални стратегии усогласени со ЕУ. Ако, пак, биде изоставена, ризикот е голем. Земјата може да заостане уште повеќе. Сиромаштијата може да се продлабочи. Разликата со ЕУ ќе расте.
На состанок во Брисел минатата недела, претставници на Европската мрежа против сиромаштијата, меѓу кои и подпретседателката Билјана Дуковска, ги претставија своите барања. Тие побараа системско учество на луѓето кои живеат во сиромаштија. Побараа повеќе финансии. И побараа подобра координација на политиките. Посебно беше нагласено дека земјите кандидатки не смеат да бидат изоставени.
Предлозите на Европската мрежа и на Македонската платформа против сиромаштијата се конкретни. Стратегијата треба да ги вклучи земјите кандидатки. Треба да ги поврзе со пристапните реформи и извештаите за напредок. Треба да обезбеди повеќе финансии. Треба да создаде заедничка платформа за соработка. Треба да ги зајакне институциите и граѓанските организации. И треба да обезбеди активно учество на луѓето со искуство во сиромаштија.
Целта, како што истакнува Роксана Минзату, е јасна. Секој Европеец треба да живее достоинствен живот. Прашањето е дали ова ќе важи за целиот континент. Или само за земјите членки. Одговорот на тоа прашање е клучен и за иднината на Македонија.
