- Од почетокот на годината заклучно до вчера откупени се околу 35 милиони килограми зелка. Откупот се одвива непречено, изјави министерот за земјоделство, шумарство и водостопанство Цветан Трипуновски при посетата на струмичкиот регион.
– Ако зборуваме за пролетната, млада зелка од оваа реколта, од крајот на февруари до вчерашниот ден откупени се околу 30.000 тони. Откупот се одвива непречено и во согласност со предвидената динамика и текот на бербата, рече Трипуновски.
Откупната цена, како што изјави, е задоволителна за земјоделците, а Инспекторатат ќе продолжи внимателно да го следи целиот процес со цел фер и нерпечен откуп.
При посетата на струмичкиот регион, Трипуновски го посети и сточарот Никола Колев, кој кон крајот на јануари претрпе штета од поплавите.
– Објектот е изграден со помош на општествено одговорни компании од овој дел и пошироко, а помогна и локалната самоуправа со механизација во делот на расчистување на речните корита. Никола сега има услови повторно да работи и да произведува, рече Трипуновски.
