Судирот на Блискиот Исток има широкопојасни импликации врз енергетиката, трговијата, глобалните ланци на снабдување и финансиските пазари, претставувајќи значајно оптоварување за светската економија, објави денеска Меѓународниот монетарен фонд (ММФ).
Во својата објава на блог, ММФ го опиша овој конфликт како „шок“ кој е „глобален, но нерамномерно распределен“ и кој дејствува главно преку три правци: цени на енергијата, трговија и финансиски услови.
Прекините во снабдувањето со енергија се особено сериозни, се додава во извештајот. „Војната, исто така, ги менува постоечките синџири на снабдување за суровини кои не се енергетски и кои се од критично значење“, напиша ММФ.
Пренасочувањето на танкери и контејнерски бродови води до зголемување на транспортните и осигурителните трошоци, како и до продолжување на роковите за испорака.
Отповикувањето на летови во клучните центри во регионот на Заливот влијае на глобалниот туризам и ја комплицира трговијата.
Државите, компаниите и потрошувачите веќе ги чувствуваат последиците од овие проблеми во синџирот на снабдување, пренесе ДПА.
„Со нарушените пратки на ѓубрива – од кои приближно една третина поминува низ Ормушката Теснина – расте загриженоста за цените на храната“, се наведува во објавата.
Резултатот од ова се повисоки цени на ѓубривата и другите меѓупроизводи.
По нападите на САД и Израел врз Иран, кои започнаа на 28 февруари, Техеран возврати со напади врз Израел и американските сојузници во Заливот.
Иранските сили, исто така, ефикасно го прекинаа поголемиот дел од поморскиот сообраќај низ Ормушката Теснина, која претставува клучна артерија за глобалното снабдување со енергија.
Генерално, ММФ предупредува на зголемување на инфлацијата во светот и на послаб економски раст. Колку ќе биде силно влијанието зависи од времетраењето, ширењето и деструктивната моќ на конфликтот.
Сепак, едно нешто е веќе јасно, истакнуваат тие: економските ризици се зголемуваат.
