Во организација на Здружението „Добредојде Македонија -Welcome Center“, а под покровителство на Амбасадата на Република Словенија, во Скопје на 17 март, заврши еднодневниот Моден форум на тема: „Мода-едукација-технологија“, во рамки на проектот: „Зајакнување на женското претприемништво преку занаети и одржливост“.
Настанот ги обедини претставниците од релевантни институции, од образовниот сектор, модната и текстилната индустрија, како и експерти и креативни професионалци, со цел поттикнување на стратешки дијалог за развој на конкурентна, иновативна и одржлива модна индустрија во земјава.
Во своето обраќање, Неговата екселенција, амбасадорот на Република Словенија, г-дин. Грегор Прескер, го истакна задоволството и важноста на меѓународната соработка и заедничките иницијативи во насока на поврзување на образованието, иновациите и индустријата меѓу двете земји:
„Горди сме на поддршката на вакви иницијативи каков што е проектот: „Зајакнување на женското претприемништво преку занаети и одржливост“ на „Добредојде Македонија – Welcome Center“, којшто претставува значаен чекор кон создавање одржливи и конкурентни креативни индустрии, базирани на знаење, иновации и партнерства.“, изјави Амбасдорот на Република Словенија, Грегор Прескер.
Основачот и претседател на Здружението „Добредојде Македонија-Welcome Center“, г-ѓа Емилија Миладинова Аврамчева, нагласи дека една од главните цели на форумот е да создаде трајна платформа за соработка.
„Овој форум не е само настан, туку едно своевидно заокружување на проектот на поврзување-меѓу луѓето, институциите и идеите, со цел да се создадат нови можности за развој на модната индустрија и женското претприемништво во нашата земја. Сведоци сме на успешни приказни коишто не само што беа иницирани од проектот, туку денес самостојно се развиваат, инспирираат и во пракса ги докажуваат заложбите на голем број едукатори и волонтери од Здружението „Добредојде Македонија – Welcome Center“ за вредноста на креативноста како двигател на прогресот и иновациите во заедницата“.
Модното образование и индустријата – состојби и предизвици
На првиот панел, на тема „Модното образование и индустријата – каде сме и што понатаму?“, учествуваа: Наташа Сивеска – извршна директорка на Текстилен кластер, Анета Атанасовска – извршна директорка на Занаетчиска комора, Росица Шабанова – директорка на СОУ „Богданци“ од Богданци и Ирина Тошева – модна дизајнерка едукаторка за одржлива мода.
Панелистите и публиката ги потенцираа клучните проблеми на македонската модна и текстилна индустрија, поврзани со: потребата за поинтензивна поврзаност меѓу образовниот систем и реалните потреби на индустријата, менување на улогата на производството за „други“ наспроти развојот на сопствени брендови, недостигот на квалификуван кадар и намалениот интерес кај младите за текстилната струка, но и недоволно искористениот потенцијал на занаетчиството како дел од современата и одржлива мода.
Технологијата и вештачката интелигенција како двигател на трансформацијата
Вториот панел на тема: „Од скица до алгоритам-технологија и вештачка интелигенција во модата“, се фокусираше на улогата на дигитализацијата и иновациите во современата модна индустрија.
Панелистите: Никола Булески сертифициран едукатр за 3D дизајн и виртуелни прототипи, Катерина Тошева – модна продукт дизајнерка, Никола Ефтимов- професор и моден дизајнер и Ангела Доневска: 3D дизајнерка и дипломиран Инженер – технолог, ги споделија своите лични и професионални искуства и визии за иднината на македонската модна и текстилна индустрија, со практичната примена на 3D дизајнот, виртуелните прототипи и вештачката интелигенција како значаен потенцијал за унапредување на продуктивноста и одржливоста на македонската текстилна индустрија!
Во рамки на панелот беше истакнато дека „3 D технологијата и вештачката интелигенција не ја заменуваат креативноста, туку ја прошируваат нејзината можност, создавајќи нови форми на израз и нови модели на производство.“
Заклучоци
Форумот: „Мода-едукација-технологија“, во рамки на проектот „Зајакнување на женското претприемништво преку занаети и одржливост“ на „Добредојде Македонија-Welcome Center“, а под покровителство на Амбасадата на Република Словенија, ја потврди потребата од интегриран пристап во развојот на модната индустрија, заснован на институционална поддршка,современо образование, технолошки иновации, и одржливи економски модели, со заедничка порака дека ваквите иницијативи и проекти треба да прераснат во континуирана платформа за дијалог, партнерства и конкретни политики, коишто ќе ја унапредат модната и текстилната индустрија во земјата.
