Бугарскиот сервис на Радио Слободна Европа ќе престане да работи на 31 март поради прекин на американското финансирање, дознава АФП од двајца членови на персоналот, неколку недели откако беше објавено слично сценарио за Романија.
Тимот активно работи на решение кое ќе „ овозможи да продолжиме да им служиме на нашите гледачи“, рече еден извор од радиото, барајќи анонимност во исчекување на официјално соопштение.
Директорката на сервисот Слободна Европа Романија – Елена Виулије Танасе, исто така пред две недели на Фејсбук најави затворање на 31 март.
„Ова секако е лоша вест. И не само за моите колеги и мене“, напиша таа, нагласувајќи дека останале само „малку професионални новинари, додека овие времиња бараат новинарска работа на толку многу фронтови“.
Раководството на институцијата Радио Слободна Европа во Прага не одговори на прашањата од агенцијата Франс Прес (АФП). „Разбираме дека (Радио Слободна Европа) мораше да направи кратења за да ги зачува сите свои активности, вклучително и емитувањето во диктатури како Русија“, изјави за АФП Павол Шалај, директор на невладината организација за меѓународна заштита на медиумите „Репортери без граници“ во Чешка.
Сепак, овие затворања „ќе го загрозат правото на граѓаните на сигурни информации“, додаде тој, нагласувајќи дека „ризикот е уште поголем во Бугарија, која чека избори, бидејќи е земја со малку независни медиуми“.
Затворањето на радиото во Унгарија на крајот на ноември беше исто така најавено, поради одлуката на американската влада, со цел да се смири унгарскиот премиер Виктор Орбан. Бугарија и Романија беа меѓу првите земји покриени од Радио Слободна Европа / Радио Слобода кога беше основано во 1950 година.
Радио станицата, делумно финансирана од американската разузнавачка агенција ЦИА до почетокот на 1970-тите, одигра клучна улога во ширењето информации надвор од Железната завеса, и покрај редовните обиди на комунистичките власти да го попречат нејзиниот сигнал и да ги вознемируваат нејзините новинари.
