Словачкиот премиер Роберт Фицо му се закани на Киев дека Братислава ќе ги прекине итните испораки на електрична енергија за Украина доколку транзитот на нафта до Словачка не се обнови до понеделник.
Овој ултиматум дополнително ги влошува затегнатите односи меѓу двете земји.
„Доколку украинскиот претседател не ги продолжи испораките на нафта до Словачка во понеделник, истиот ден ќе побарам од надлежните словачки компании да ги прекинат итните испораки на електрична енергија до Украина“, рече Фицо.
Тој го обвини украинскиот претседател Володимир Зеленски дека се однесува „злонамерно“ кон Братислава затоа што не ја поддржува војната и не го почитува „мирниот пристап“ на Словачка. Фицо тврди дека Украина прво го запрела протокот на гас до Словачка, што, како што вели тој, предизвикало штета од 500 милиони евра годишно, а потоа испораките на нафта, што создало дополнителни загуби и логистички проблеми.
Тој нагласи дека Словачка ѝ помага на Украина од почетокот на војната, истакнувајќи дека на нејзина територија има околу 180.000 Украинци, дека им обезбедува хуманитарна помош и организира заеднички владини состаноци. Тој тврди дека Братислава прави „значително повеќе од некои други земји“.
„Ако на Западот не му пречи што гасоводот „Северен тек“ беше дигнат во воздух, Словачка не може да прифати дека словачко-украинските односи се еднонасочна улица од која има корист само Украина. Словачка е горда и суверена земја, а јас сум горд и суверен Словак“, рече Фицо.
Тој најави дека, доколку не се обноват испораките на нафта, ќе побара од државната компанија СЕПС да ги прекине итните испораки на електрична енергија за Украина. Фицо тврди дека ваквите испораки, клучни за стабилизацијата на украинската електроенергетска мрежа, биле потребни двојно повеќе само во јануари 2026 година отколку во целата 2025 година.
Во истиот контекст, Фицо ја оправда одлуката на Словачка да не учествува во најновиот заем од Европската унија од 90 милијарди евра за Украина.
„Со оглед на неприфатливото однесување на претседателот Зеленски кон Словачка, која ја третира како непријателска земја, сметам дека е сосема точно што одбив да ја вклучам Словачката Република во тој воен заем“, рече тој.
Унгарскиот министер за надворешни работи, Петер Сијарто, претходно објави дека Будимпешта го блокира одобрувањето на истиот заем додека не се врати транзитот на нафта. Така, Унгарија и Словачка заеднички го зголемија енергетскиот и финансискиот притисок врз Киев.
