Европскиот производител на авиони „Ербас“ склучи договор за нарачка со полската национална авиокомпанија ЛОТ за најмалку 40 авиони А 220.
Аналитичарите велат дека договорот вреди околу 3,5 милијарди долари (3,2 милијарди евра) и дека нарачката на крајот би можела да се зголеми на 84 авиони, објави „Ројтерс“.
Оваа инвестиција, која алудира на подобрување на политичките врски меѓу Полска и Франција, следеше по жестоката борба меѓу европскиот „Ербас“, чие седиште се наоѓа во Франција, и бразилскиот „Ембраер“, околу реализацијата на овој амбициозен план во Варшава, според „Ројтерс“.
„Ова е најголемата инвестиција во историјата на полскиот национален превозник и е дел од изградбата на Полска како лидер во воздушниот транспорт во Европа“, изјави полскиот премиер Доналд Туск.
Раководителите на ЛОТ нагласија дека А 220 е избран исклучиво од економски причини.
Во 2016 година, Полска откажа договор од 3,5 милијарди долари за 50 воени хеликоптери Х225М „Каракал“.
Ова предизвика бурна реакција од јавноста, Ербас и француската влада, која потоа објави дека ќе ја преиспита одбранбената соработка со својот источноевропски сојузник во НАТО, според Ројтерс.
