Малку позната руска компанија побара од рускиот претседател Владимир Путин имотот на швајцарската прехранбена групација Nestlé во Русија да биде ставен под привремена управа, објави во понеделникот весникот „Комерсант“.
Барањето, поднесено од компанијата KS Logistika, опфаќа пет субјекти во сопственост на Nestlé во Русија и, во теорија, би можело да доведе до промена на сопственичката структура.
Од Nestlé за Reuters изјавиле дека руските власти не ги контактирале во врска со ова барање. Компанијата соопштила дека продолжува со работењето на своите канцеларии и фабрики во Русија, со почитување на сите регулаторни барања.
Компанијата KS Logistika во 2025 година остварила приходи од 1,6 милиони рубљи, а се смета дека ги застапува интересите на трети страни.
Русија ја заостри контролата врз имотот во странска сопственост по почетокот на војната во Украина во 2022 година. Според декретот што Путин го потпиша во 2023 година, Москва има овластување имотот на компании од земји кои ги смета за „непријателски“ да го стави под привремена управа.
Овој механизам претходно беше искористен за преземање контрола врз руските подружници на компании како Danone и Carlsberg. Nestlé продолжи со работењето во Русија, со образложение дека како производител на храна го снабдува населението со основни производи.
Според извор на „Комерсант“, барањето е поврзано со одлуката на Nestlé да не ги проширува производствените капацитети во Русија и да го прекине извозот на производи произведени во своите руски фабрики.
Руската консултантка Наталија Поправко изјавила за „Комерсант“ дека привремената управа не значи нужно конфискација на имотот. Сепак, таа напоменала дека некои компании на крајот биле конфискувани или продадени на руски инвеститори.
Повикувајќи се на индустрискиот аналитичар Михаил Бурмистров, „Комерсант“ наведува дека рускиот бизнис на Nestlé би можел да вреди меѓу 160 и 175 милијарди рубљи, односно меѓу 1,9 и 2,1 милијарда долари.
Nestlé управува со шест производствени локации во Русија – во Калуга, Вологда, Самара, Владимир, Перм и Краснодарскиот регион, каде што произведува кафе, кондиторски производи, храна за бебиња и храна за домашни миленици.
