Шпанската коалициска влада усвои нов пакет мерки во областа на домувањето со цел да ја ублажи станбената криза, вклучително и забрана за иселувања до 2030 година и забрана инвестициските компании да купуваат станови.
Одлуката доаѓа по масовните протести и случајот со иселувањето на 87-годишна жена во Мадрид, кој предизвика големо внимание во јавноста.
Случајот со 87-годишната Марикармен Абаскал, која минатата недела на носилки насилно беше изнесена од својот дом и пренесена во болница, стана симбол на станбената криза во Шпанија. Нејзиниот татко првпат го изнајмил станот во 1956 година, но откако недвижноста во 2018 година ја презела инвестициската компанија Урбагестијон, киријата е зголемена над износот на нејзината месечна пензија.
Иако во меѓувреме е постигнат начелен договор таа да се врати во станот, нејзиниот случај предизвика низа протести во Мадрид, Барселона и други градови.
Владата предводена од премиерот Педро Санчес одобри две уредби кои стапуваат во сила веднаш, но парламентот треба да ги потврди во рок од 30 дена.
Новите мерки ќе донесат олеснување за повеќе од пет милиони луѓе.
Пакетот мерки вклучува забрана за иселувања до 2030 година, автоматско продолжување на договорите за наем до 2028 година, забрана инвестициските компании да купуваат станови, како и построга регулација на краткорочното изнајмување и изнајмувањето одделни соби.
Министерката за домување Исабел Родригез ги повика политичките партии да ги поддржат уредбите во Конгресот.
„Парламентот има можност да ѝ каже на Марикармен дека нејзиното страдање имало смисла и дека многу луѓе ќе имаат корист од нејзината борба“, изјави Родригез.
Усвојувањето на мерките во парламентот ќе биде голема пречка за левичарската малцинска влада. Десничарските и центристичките партии уште во април го блокираа претходниот обид за продолжување на договорите за наем.
Според проценките на Банката на Шпанија, на земјата ѝ недостигаат дури 700.000 станбени единици за да се задоволи сегашната побарувачка.
Официјалните податоци на Националниот институт за статистика (INE) покажуваат дека цените на недвижностите во вториот квартал од 2026 година пораснаа за 12,2 отсто на годишно ниво. Во исто време, трошоците за наем во изминатата година се зголемија за 8,5 отсто, додека во Мадрид е забележан раст од 9,7 отсто.
