Големи делови од северна и источна Чешка, вклучувајќи ја и Прага, денес се соочуваат со прекини во снабдувањето со електрична енергија, наводно поради дефект на голема трафостаница на источната периферија на главниот град на земјата.
„Струја снема на целиот источен брег на реката Влтава, но метрото и неколку трамвајски линии наскоро беа рестартирани“, објави заменик-градоначалникот на Прага, Здењек Хжиб.
Аеродромот „Вацлав Хавел“ функционира нормално, а во Прага, на источната страна од Влтава, банкоматите и семафорите не работат, додека продавниците и рестораните се без електрична енергија, пренесува info.cz.
Портпаролот на противпожарната станица, Мирослав Резач, изјави дека неколку десетици луѓе се заглавени во лифтовите. Во некои згради се активирани противпожарни аларми.
Комуналната компанија PRE објави дека го поправа дефектот, но не е познато кога граѓаните повторно ќе добијат електрична енергија.
Електричната енергија исчезна и во поголемите градови околу Прага, како што е Млада Болеслав, каде што се наоѓа фабриката за автомобили „Шкода“.
