Германскиот Бундестаг доцна во четвртокот усвои законски измени со кои значително се зголемува данокот на тутунот, со поддршка на коалицијата составена од ЦДУ/ЦСУ и СПД. Според новите правила, просечната цена на кутија од 20 цигари до 2030 година би требало да порасне за речиси четири евра и да достигне нешто помалку од 12 евра.
Поскапување го очекува и ситно сечканиот тутун што се користи за рачно виткање цигари.
Во Германија пушат милиони луѓе. Според микропописот од 2025 година, 19 проценти од населението постаро од 15 години се пушачи.
Германскиот министер за финансии Ларс Клингбајл го оправдува зголемувањето на данокот со два главни аргумента – стабилизирање на буџетот и заштита на здравјето. Тој изјави дека во буџетот има недостиг од 34 милијарди евра, а една од целите е да се поттикне поздрав начин на живот, особено кај децата и младите.
Владата очекува дополнителни приходи до 1,5 милијарди евра уште следната година, додека до 2030 година таа сума би можела да достигне околу 12 милијарди евра.
Сепак, тутунската индустрија се сомнева дека овие процени ќе се остварат. Компаниите предупредуваат дека значителното поскапување може да ги натера пушачите да се свртат кон црниот пазар, каде што цигарите се продаваат по пониски цени, без плаќање на законските даноци. Тоа би можело да предизвика загуби за легалните трговци и да ги намали очекуваните буџетски приходи.
И самите пратеници од владејачката коалиција признаваат дека постои ризик од ширење на нелегалната трговија, илегалното производство и продажбата на тутунски производи од странство без плаќање данок. Поради тоа, тие бараат засилени контроли од царинските служби и усогласување на даночните политики за тутунот на европско ниво.
Против реформата гласаа Алтернатива за Германија (АфД), Зелените и Левицата, како и двајца пратеници од ЦДУ/ЦСУ. Пратеникот на АфД, Кристијан Даглас, ја обвини владата дека не очекува намалување на пушењето, туку пред сè сака да ги зголеми буџетските приходи.
Од друга страна, германскиот федерален комесар за прашања поврзани со дрогите, Хендрик Штрик, го поздрави поскапувањето. Според него, повисоките цени можат да ги поттикнат пушачите да се откажат од цигарите, а особено важна е заштитата на младите.
Податоците на Германскиот центар за истражување на ракот покажуваат дека во 2023 година околу 131.000 луѓе во Германија починале од болести поврзани со употребата на тутун.
За законот треба да одлучува и Бундесратот, горниот дом на германскиот парламент. Засега не се очекува противење што би го спречило зголемувањето на данокот.
